اهلا:: بقلم المهندس باجس عراف-معليا

دايمًا بفترة الصيف كثير ناس بسألوني عن إمكانية وضع بركة سباحة على البرندات أو على الأسطح.
بحب اوضّح كم نقطة بهالموضوع:
1- ممنوع إتخاذ هيك قرار بدون إستشارة مهندس.
2- الأحمال المتنقّلة اللي منوخذا بحساباتنا وقت تخطيط البيوت السكنية بحسب المعايير المقررة هي 150 كيلوغرام لكل متر مربع، يعني اذا بدنا نقارنا مع المي بالبركة فهي عبارة عن مياه باتفاع 15 سم فقط! يعني كل سانتي أعلى من ال 15 هو زيادة عن المسموح. بركة مع مياه بارتفاع متر هي عبارة عن 1000 كيلوغرام لكل متر مربع!!!
3- بالنسبة للسطوح فنفس الكلام ينطبق هون، أما اللي عندو ملجأ بالبيت، فسقف الملجأ بشكل عام بتحمل أوزان وأحمال أعلى بكثير من باقي المبنى. مفضل بهاي الحالة وضع البركة بشكل انو ما تطرد كثير خارج حيطان الملجأ. بالإضافة لإنه بشكل عام أسطح المنازل ما بتكون مبلّطة، يعني مش حاملة أوزان كثيرة. فممكن هون تحطو برك مع مياه بارتفاع لحد 50 سم.
4- اللي بفضّل مع كل هذا وضع البركة ع السطح، ممكن يبني (باستشارة مهندس) منشأة أو إطار معدني اللي بيرتكز على عمدان البيت وعليه بحط البركة.
5- مفضل وضع برك السباحة على المساطب الي تحتا أرض، تربة او صخور، في الجناين والساحات.
6- من غير المحبذ وضع البركة حد حيط داعم (קיר תומך) بالمستوى الفوقاني. مفضل الابتعاد عن الحيط بمسافة مش أقل من قياس ارتفاعه.
7- اللي ذكرته هو مش تصريح بوضع بركة بحالات معينة، انما فقط للفت الإنتباه لإنو الموضوع مش بهالبساطة.
8- برجع ع النقطة الأولى، قبل وضع أي بركة بأي محل بالبيت يجب إستشارة مهندس.